ភ្នំពេញ៖ នៅថ្ងៃទី៨ ខែមករា ឆ្នាំ២០២៤នេះ ក្រុមហ៊ុន រ៉ូយ៉ាល់ គ្រុប ត្រាស់ធី ឯ.ក របស់អ្នកឧកញ៉ា គិត ម៉េង បានដាក់ឲ្យដំណើរថ្នាលជួញដូរ Royal Group Exchange «RGX» ដែលជាវេទិកាជួញដូរមូលបត្រឌីជីថលដំបូងគេដោយប្រើប្រាស់បច្ចេកវិទ្យាប្លុកឆេន ដែលត្រូវបានផ្តល់ការអនុញ្ញាតពីនិយ័តករមូលបត្រកម្ពុជា (SERC)។
ពិធីដាក់ដាក់ឲ្យដំណើរការថ្នាលជួញដូរ «RGX» ដែលប្រើប្រាស់បច្ចេកវិទ្យាប្លុកឆេន នៅក្នុងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្រនេះ ត្រូវបានធ្វើឡើងក្រោមអធិបតីភាព ឯកឧត្តម ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ, ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា និងអ្នកឧកញ៉ា គិត ម៉េង ប្រធាន និងជានាយកប្រតិបត្តិ ក្រុមហ៊ុន រ៉ូយ៉ាល់ គ្រុប។
អ្នកឧកញ៉ា គិត ម៉េង បានមានប្រសាសន៍ថា នេះជាព្រឹត្តិការណ៍ដ៏សំខាន់មួយសម្រាប់ទិដ្ឋភាពហិរញ្ញវត្ថុរបស់ប្រទេសនេះ ខណៈដែលយើងណែនាំថ្នាលដែលបើកទ្វារសម្រាប់ប្រទេសនេះ ដើម្បីឈានចូលយុគសម័យថ្មីនៃសេរីភាព និងឱកាសហិរញ្ញវត្ថុ។ សម្រាប់ក្រុមហ៊ុនរ៉ូយ៉ាល់គ្រុប ថ្នាល RGX មិនត្រឹមតែជាវេទិកាពាណិជ្ជកម្មប៉ុណ្ណោះទេ វាគឺជាសក្ខីភាពមួយចំពោះការប្តេជ្ញាចិត្តរបស់យើងចំពោះការបង្កើតថ្មី វឌ្ឍនភាព និងអនាគតសម្រាប់យុវជនកម្ពុជា។
អ្នកឧកញ៉ា ប្រធានបានបន្តថា ជាមួយនឹងការទទួលស្គាល់ជាផ្លូវការ និងក្រោមគម្រោង Securities Digital Sandbox ដោយមានការយល់ព្រមពី SERC ដូច្នេះ RGX បានផ្តល់នូវបរិយាកាសសុវត្ថិភាពសម្រាប់បុគ្គល និងអាជីវកម្ម មកពីជុំវិញពិភពលោក ក្នុងការទិញ លក់ និងជួញដូរទ្រព្យសម្បត្តិផ្សេងៗ។ គោលការណ៍ស្នូលមួយរបស់ Royal Group គឺការប្តេជ្ញាចិត្តចំពោះការអនុលោមតាមច្បាប់ និងសុវត្ថិភាព ហើយយើងមានកិត្តិយសដែល SERC បានផ្តល់ឱ្យយើងនូវការជឿទុកចិត្តក្នុងការបង្កើត RGX ក្រោមគម្រោង Sandbox របស់ SERC ដើម្បីជំរុញការបង្កើតថ្មីផ្នែកហិរញ្ញវត្ថុ។
អ្នកឧកញ៉ាប្រធាន បានថ្លែងអំណរគុណចំពោះដៃគូរបស់ក្រុមហ៊ុន អាជ្ញាធរនិយ័តករ និងអ្នកពាក់ព័ន្ធ ដែលខិតខំប្រឹងប្រែង ក្នុងការគាំទ្រ និងខិតខំប្រឹងប្រែងបានធ្វើឱ្យថ្នាលជួញដូរ Royal Group Exchange ក្លាយជាការពិត។
អ្នកឧកញ៉ា គិត ម៉េង បានបន្ថែមទៀតថា RGX មានបំណងក្លាយជាកត្តាជំរុញសម្រាប់ការផ្លាស់ប្តូរ លើកកម្ពស់ការរួមបញ្ចូលផ្នែកហិរញ្ញវត្ថុ និងផ្តល់សិទ្ធិអំណាចដល់សមាជិកទាំងអស់នៃសហគមន៍របស់យើង ក្នុងការទទួលបានឱកាសដែលបង្ហាញដោយសេដ្ឋកិច្ចឌីជីថល។ ការបើកដំណើរការវេទិកាជួញដូរ RGX នៅក្នុងបទប្បញ្ញត្តិ FinTech ក្នុងវិស័យមូលបត្រ គឺជាសក្ខីភាពមួយចំពោះភាពជឿនលឿននៃបច្ចេកវិទ្យាហិរញ្ញវត្ថុ (FinTech) ក្នុងវិស័យមូលបត្រកម្ពុជា ។
ឯកឧត្តម ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនិយ័តករមូលបត្រកម្ពុជា បានលើកឡើងថា ការដាក់ឱ្យដំណើរការនូវថ្នាលជួញដូរ «RGX» នៅក្នុងបរិស្ថានសាកល្បងបច្ចេកវិទ្យាហិរញ្ញវត្ថុក្នុងវិស័យមូលបត្រ គឺជាសញ្ញាដ៏ជាក់ច្បាស់ដែលបង្ហាញពីវឌ្ឍនភាពនៃបច្ចេកវិទ្យាហិរញ្ញវត្ថុនៅក្នុងវិស័យមូលបត្រ។
ឯកឧត្តមបានបញ្ជាក់ថា នេះគឺជាជំហានដ៏ធំថ្មីមួយទៀតដែលយើងបានឈានទៅមុខ ហើយជាសក្ខីភាពនៃការខិតខំប្រឹងប្រែងរបស់និយ័តករមូលបត្រកម្ពុជា ក្នុងការជំរុញនវានុវត្តន៍, ធានានូវសុចរិតភាពទីផ្សារ, និងការការពារវិនិយោគិន ព្រមទាំងការចូលរួមយ៉ាងសកម្ម ពីគ្រប់ភាគីចូលរួមទាំងអស់ ជាពិសេសគឺវិស័យឯកជនដែលមានក្រុមហ៊ុន រ៉ូយ៉ាល់ គ្រុប ត្រាស់ធី ឯ.ក ផ្ទាល់។
ថ្នាលជួញដូរ «RGX» គឺជាថ្នាលជួញដូរ ដែលប្រើប្រាស់បច្ចេកវិទ្យាប្លុកឆេន។ បច្ចេកវិទ្យាប្លុកឆេននេះ ត្រូវបានមជ្ឈដ្ឋានទូទាំងពិភពលោកចាត់ទុកថាជាបច្ចេកវិទ្យាថ្មីមួយ ដែលអាចជួយបង្កើននូវប្រសិទ្ធិភាព សុវត្ថិភាព និងតម្លាភាពនៃប្រតិបត្តិការហិរញ្ញវត្ថុ ព្រមទាំងបង្កើតនូវកាលានុវត្តភាពជាផលិតផល និងសេវាកម្មហិរញ្ញវត្ថុថ្មីៗ ជាពិសេសនៅក្នុងវិស័យមូលបត្រ។
លក្ខណៈពិសេសនៃបច្ចេកវិទ្យាប្លុកឆេន បង្កើតឱ្យមានជាបណ្តាញប្រព័ន្ធទិន្នន័យក្នុងទម្រង់វិមជ្ឈការ ដែលអាចរក្សារាល់ប្រតិបត្តិការជួញដូរទាំងអស់ដែលកើតមានឡើង ព្រមទាំងអាចផ្ទៀងដោយគ្រប់ភាគីពាក់ព័ន្ធ និងមិនអាចកែប្រែបានឡើយ មួយវិញទៀតរាល់ការធ្វើប្រតិបត្តិការត្រូវអនុលោម តាមវិធានរួមមួយ ក្នុងទម្រង់ជាកិច្ចសន្យាឆ្លាតវៃ (Smart Contract)៕
