សិក្សាផ្លូវច្បាប់សំខាន់ៗចំនួន 3 មុននឹងសម្រេចិត្តទិញអចលនទ្រព្យ

ភ្នំពេញ ៖  មុននឹងសម្រេចចិត្តទិញអចលនទ្រព្យប្រភេទណាមួយមិនថាជាផ្ទះ ឬជាដី  សម្រាប់ធ្វើការវិនិយោគដើម្បីទទួលបានផលចំណេញ និងសុវត្ថិភាពនៅពេលខាងមុខ ឬ សម្រាប់រស់នៅ ឬក៏ជួល អ្នកទិញគ្រប់រូប គួរពិនិត្យឱ្យបានច្បាស់លាស់លើចំណុចចំនួន 3 សំខាន់ៗនៃផ្លូវច្បាប់ដូចខាងក្រោម៖ 

ទី1 អ្នកទិញគ្រប់រូប ត្រូវពិនិត្យមើលទៅលើប្រវត្តិនៃការកាន់កាប់ទីតាំងអចលនទ្រព្យនោះឱ្យបានត្រឹមត្រូវតាមផ្លូវច្បាប់ ដើម្បីដឹងច្បាស់ថាអចលនទ្រព្យនោះជាប់ពាក់ព័ន្ធនឹងជម្លោះ ឬបានកាត់ផ្ទេរកម្មសិទ្ធិត្រឹមត្រូវដែរឬទេ?

ទី2 អ្នកទិញគ្រប់រូបត្រូវពិនិត្យលើប្រភេទប្លង់កម្មសិទ្ធិកាន់កាប់អចលនទ្រព្យ តើប្រភេទប្លង់រឹង ឬប្លង់ទន់ ? ប្លង់ទន់ទទួលស្គាល់ដោយអាជ្ញាធរថ្នាក់ក្រោមជាតិ ហើយការកាន់កាប់អចលនទ្រព្យប្លង់ប្រភេទនេះមិនទាន់បានទទួលស្គាល់ ឬគាំពារដោយច្បាប់ពេញលេញនៅឡើយ ដែលគេអាចមានការជំទាស់បាន ក្នុងករណីដែលមានការជំទាស់ ឬវិវាទកើតឡើងនៅពេលចុះបញ្ជីលក្ខណៈជាប្រព័ន្ធ។ 

ដូច្នេះ រាល់ការលក់ទិញអចលនទ្រព្យ ដែលមានបណ្ណកម្មសិទ្ធិកាន់កាប់អចលនទ្រព្យជា  “ប្លង់ទន់” ត្រូវប្រុងប្រយ័ត្នឱ្យបានខ្ពស់ ដើម្បីជៀសវាងនូវវិវាទកើតឡើង។ ភាគច្រើន នៃអ្នកកាន់កាប់អចលនទ្រព្យនៅកម្ពុជាមានបណ្ណកម្មសិទ្ធិជាប្លង់ទន់ ដែលជាទូទៅចំណាយពេលប្រហែល10 ថ្ងៃដើម្បីធ្វើការផ្ទេរសិទ្ធិ។
ចំពោះប្លង់រឹងវិញ ជាបណ្ណកម្មសិទ្ធិដែលផ្តល់ និងទទួលស្គាល់ដោយក្រសួងរៀបចំដែនដី នគរូបនីយកម្ម និងសំណង់។

ទោះបីប្លង់រឹងចេញដោយអាជ្ញាធរថ្នាក់ជាតិក៏ដោយ អ្នកទិញត្រូវត្រួតពិនិត្យលើគល់បញ្ជីនៃការចុះបញ្ជីកាន់កាប់កម្មសិទ្ធិបន្ថែមទៀត ដើម្បីដឹងច្បាស់ថា អចលនទ្រព្យនោះពិតជាមានឈ្មោះម្ចាស់កម្មសិទ្ធិ ដែលបានចារឹកនៅលើប្លង់រឹងនោះពិតប្រាកដមែន និងបានចុះបញ្ជីត្រឹមត្រូវតាមនិតិវិធីច្បាប់។ ព្រោះកន្លងមកធ្លាប់មានករណីវិវាទនៃការទិញ-លក់អចលនទ្រព្យដែលមានកម្មសិទ្ធិជាន់គ្នា ។

ដោយឡែក រាល់ការផ្ទេរសិទ្ធិអចលនទ្រព្យប្លង់រឹងត្រូវជាប់បន្ទុកបង់ពន្ធប្រថាប់ត្រា 4 ភាគរយនៃតម្លៃទ្រព្យ បូកនឹង 1,000 ដុល្លារ លើថ្លៃសេវារដ្ឋបាលសូវិយោដី ហើយជាមធ្យមត្រូវការរយៈពេល 12 សប្តាហ៍ទើបសម្រេចការផ្ទេរសិទ្ធិទៅភាគីអ្នកទិញ។ 

និងទី3 គ្រប់អ្នកទិញ ត្រូវពិនិត្យទៅលើស្ថានភាពជាប់បន្ទុកនៃអចលនទ្រព្យនោះ ដូចជាការជាប់បន្ទុកនៅធនាគារ ការដាក់បញ្ចាំ ឬការដាក់ធានាបំណុល  និងត្រូវពិនិត្យថា តើអចលនទ្រព្យនោះមានទំនាស់ ឬហាមឃាត់ដោយដីការរក្សាការពាររបស់តុលាការដែរឬទេ ៕