Hot line: +855 (0)99 283 388
ភ្នំពេញ៖ ការវិនិយោគលើវិស័យសំណង់នៅទូទាំងប្រទេសកម្ពុជា នៅក្នុងឆ្នាំ២០១៧ មានចំនួនសរុប ៣,០៥២ គម្រោង ដែលមានតម្លៃប៉ាន់ស្មាន ៦,៤២៨លានដុល្លារ នៅក្នុងឆ្នាំ២០១៧ ។ ទំហំទុនវិនិយោគនេះ កើនឡើងជាង ២២ភាគរយ បើធៀបនឹងឆ្នាំ២០១៦ ដែលមានជាង ៥,២៥៦លានដុល្លារ។
ការវិនិយោគលើវិស័យសំណង់នៅទូទាំងប្រទេសកម្ពុជា នៅក្នុងឆ្នាំ២០១៧ មានចំនួនសរុប ៣,០៥២ គម្រោង និងផ្ទៃក្រឡា សរុប១០,៧៤៦,២១៩ម៉ែត្រការ៉េ។ ក្នុងនោះមានសំណង់លំនៅដ្ឋានសរុបចំនួន ២,២៩១គម្រោង ដែលមានផ្ទៃក្រឡាសរុបចំនួន ៥,៥៧៥ ,១៩១ ម៉ែត្រការ៉េ មានទំហំទុនវិនិយោគ ចំនួន ២,២៣០,៦៥៤,៧១៩ ដុល្លារ។ នេះបើតាមសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ដែលបានបញ្ជាក់ទៀតថា តម្លៃប៉ាន់ស្មាននៃការវិនិយោគលើវិស័យសំណង់ទាំងជាង៣ពាន់គម្រោងនេះ មានប្រមាណ ៦,៤២៨,៧៩៤,១៧៩ ដុល្លារ។ ទំហំនេះកើនឡើងចំនួន២២,៣១ភាគរយ ធៀបនឹងឆ្នាំ២០១៦ ដែលមានតម្លៃប៉ាន់ស្មានទុនវិនិយោគប្រមាណ៥,២៥៦,១២០,៧០៤ដុល្លារ។
តាមប្រកាសព័ត៌មានដដែល វិស័យសំណង់នេះ បានបង្កើតការងារជាច្រើនជូនប្រជាពលរដ្ឋជាមធ្យមពី ២៥៥,០០០ នាក់ ទៅ ២៦០,០០០នាក់ ក្នុងមួយថ្ងៃ ក្នុងនោះរាជធានីភ្នំពេញ មានចំនួនកម្មករប្រមាណពី ១២៥,០០០នាក់ ទៅ ១៣០,០០០ នាក់។ តាមរយៈការសិក្សារបស់ក្រសួងរៀបចំដែនដី ក្នុងឆ្នាំ២០១៧នេះ តម្លៃពលកម្ម សម្រាប់កម្មករគ្មានជំនាញ អាចទទួលបានពី ៣៥,០០០រៀល ដល់ ៤ម៉ឺនរៀលក្នុងមួយថ្ងៃ និងសម្រាប់កម្មករមានជំនាញ និងមេជាងក្នុងមួយថ្ងៃ ទទួលបានពី៥ម៉ឺនរៀល ទៅ ៧ម៉ឺនរៀល និងពី ៤០០ដុល្លារ ទៅ៥០០ដុល្លារ ក្នុងមួយខែ សម្រាប់វិស្វករ ស្ថាបត្យករ និងជំនាញផ្សេងទៀត៕