មានភូមិសាស្ត្រស្ថិតនៅភាគពាយព្យនៃរាជធានីភ្នំពេញ ខណ្ឌសែនសុខ គឺជាខណ្ឌទើបបានបង្កើតថ្មីក្នុងឆ្នាំ២០០៩ ដែលមានផ្ទះក្រឡាប្រមាណ៥៩គីឡូម៉ែត្រការ៉េ និងមានព្រំប្រទល់ជាប់នឹងខណ្ឌមានជ័យ ខណ្ឌពោធិ៍សែនជ័យ ខណ្ឌទួលគោក ខណ្ឌឫស្សីកែវ និងខណ្ឌព្រែកព្នៅ។ នារយៈពេលប៉ុន្មានឆ្នាំចុងក្រោយនេះ ខណ្ឌថ្មីនេះកំពុងបង្ហាញពីសក្តានុពលទាក់ទាញរបស់ខ្លួនជាច្រើនវិស័យ។
ស្របពេលដែលកំណើនតួលេខដង់ស៊ីចំនួនប្រជាជនកាន់តែខ្ពស់ស្ថិតនៅក្នុងរាជធានីភ្នំពេញ នៅក្នុងខណ្ឌសែនសុខ នាជាយទីក្រុងនេះក៏មានសម្ទុះខ្លាំងទាំងកំណើនប្រជាជន និងការអភិវឌ្ឍផ្នែកអចលនទ្រព្យកាន់តែច្រើនដូចជា ចំនួនលំនៅឋានក្នុងបុរី ផ្សារ ទំនើបរួមទាំងផ្សារក្នុងស្រុក និងផ្សារអន្តរជាតិ គម្រោងសាងសង់សំណង់នានានៅក្នុងតំបន់។ លើសពីនេះ ផ្នែកហេដ្ឋារចនាសម្ព័ន្ធថ្នាក់ជាតិ ដូចជាសំណង់ផ្លូវ ស្ពាន លូ និងអគារមន្ទីរ ការិយាល័យរាជការមួយចំនួនក៏មានវត្តមានច្រើននៅក្នុងខណ្ឌនេះដែរ។
លោក ហោ វាសនា អភិបាលរងនៃគណៈអភិបាលខណ្ឌសែនសុខ បានឲ្យដឹងថា ប្រជាជនភាគច្រើនបានផ្លាស់ប្តូរលំនៅរបស់ខ្លួនពីផ្នែកកណ្តាលនៃរាជធានី ដូចជាខណ្ឌចំការមន ដូនពេញ ៧មករា ជាដើម បានមករស់នៅទីនេះជាបន្តបន្ទាប់ គឺបន្ទាប់ពីមានការវិនិយោគជាច្រើនជាពិសេសផ្នែកអចលនទ្រព្យ និងគម្រោងវិនិយោគបែបអាជីវកម្មចម្រុះនានា។ ទាំងនេះក៏ជំរុញឲ្យតម្លៃដីធ្លី នៅក្នុងខណ្ឌនេះ បានហក់ឡើងខ្ពស់ និងធ្វើឲ្យប្រជាជនមូលដ្ឋានរួមទាំងអ្នកចំណូលថ្មីអាចធ្វើការផ្លាស់ប្តូរដើម្បីមានលទ្ធភាពពង្រីកអាជីវកម្ម ឬមុខរបររបស់ពួកគេផងដែរ។
ជាក់ស្តែងចំនួនប្រជាជនសរុបនៅក្នុងខណ្ឌសែនសុខនារយៈពេលជិត១០ឆ្នាំចុងក្រោយនេះ បានកើនឡើងពី ១២ ម៉ឺននាក់ទៅ ១៦ ម៉ឺននាក់។
លោកអភិបាលរងរូបនេះបន្តថា ៖ «កំណើនប្រជាជននៅខណ្ឌ សែន សុខ មានចំនួនកើនឡើងខ្លាំងស្របពេលដែលចំនួនអចលនទ្រព្យនៅតំបន់នេះមានសម្ទុះយ៉ាងគំហុកដូចជាសំណង់លំនៅឋាន អគារផ្សារទំនើប និងសំណង់អាជីវកម្មផ្សេងៗទៀតជាច្រើនបន្តរីកដុះដាលរៀងរាល់ថ្ងៃ»។
លោក ហោ វាសនា បន្តទៀតថា បើនិយាយពីស្ថានភាពជាក់ស្តែងនៃការរស់នៅរបស់ប្រជាពលរដ្ឋភាគច្រើន បានបង្ហាញពីកំណើនជីវភាពប្រសើរឡើង គឺស្ទើរតែនៅក្នុងខណ្ឌសែនសុខទាំងមូល។ ចំណែកការសាងសង់សំណង់ ការទិញលក់ ក៏មានប្រជាជនមួយចំនួនទិញលក់ដើម្បីធ្វើការវិនិយោគរកប្រាក់ចំណេញ និងសម្រាប់រស់នៅប្រកបដោយសុវត្ថិភាពដែរ។
ការចាប់ផ្តើមរីកលូតលាស់នៃខណ្ឌនេះ គេអាចសង្កេតឃើញថា ទីផ្សារអចលនទ្រព្យបានរីកដុះដាលយ៉ាងឆាប់រហ័ស។
ថ្មីៗនេះ ផ្សារទំនើប Makro លក់ទំនិញបោះដុំ បានបើកសម្ពោធជាផ្លូវការដែលធ្វើឲ្យសេដ្ឋកិច្ច និងពាណិជ្ជកម្មនៅទីនោះកាន់តែរស់រវើករីកចម្រើនថែមទៀត។
លើសពីនេះនៅក្នុងខណ្ឌសែនសុខ ក៏មានទាំងប្រព័ន្ធហេដ្ឋារចនាសម្ព័ន្ធផ្លូវថ្នល់ធំៗ ផ្សារ និងស្ពានអាកាស ដែលកំពុងសាងសង់ដោយថវិការបស់ជាតិ និងផ្នែកឯកជនឬក៏ផ្សារទំនើបៗដូចជា ផ្សាររតនាផ្លាហ្សា ផ្សារ Attwood និងផ្សារអ៊ីអនទី ២ ដែលអាចនឹងបពា្ចប់ការសាងសង់ក្នុងពេលឆាប់ៗនេះ។
លោកបានបង្ហាញថា ៖ «តាមអ្វីដែលខ្ញុំសង្កេតមើលទៅ ដូចមិនអាចរកខណ្ឌណាមកប្រៀបធៀបជាមួយខណ្ឌសែនសុខនេះបាននៅក្នុងសម្ទុះនៃវិស័យសំណង់ និងអចលនទ្រព្យបានទេ ប៉ុន្តែខណ្ឌចំការមនមានតម្លៃអចលនទ្រព្យខ្ពស់ជាមួយនឹងការប្រមូលផ្តុំសេវាកម្ម និងពាណិជ្ចកម្មច្រើន»។
ផ្ទះនៅក្នុងបុរីមួយចំនួននៅខណ្ឌសែនសុខ អាចមានតម្លៃទៅដល់ជិត១លានដុល្លារ ដែលជាប្រភេទផ្ទះវីឡាប្រណីតសម្រាប់អ្នកដែលមានធនធានខ្លាំង ប៉ុន្តែប្រជាជនធម្មតាអាចវិនិយោគបានលើប្រភេទអចលនទ្រព្យផ្សេងគ្នា។
ទៅថ្ងៃអនាគតខណ្ឌសែនសុខ នឹងមានការរីកដុះដាលច្រើនដែលគ្មានអ្នកណានឹកស្មានដល់ទាំងផ្នែករដ្ឋ និងផ្នែកឯកជន ហើយប្រសិនបើផ្សារទំនើបអ៊ីអនទី ២ បញ្ចប់ជាស្ថាពរ ប្រជុំផ្ទះ និងអចលនទ្រព្យគ្រប់ប្រភេទនឹងកើតឡើងនៅជុំវិញតំបន់នោះដោយសារវាជាកន្លែងប្រមូលផ្គុំអាជីវកម្ម និងសេវាកម្មច្រើន។
បើនិយាយពីអាជីវកម្ម និងសេវាកម្ម តំបន់ខណ្ឌសែនសុខ អាចក្លាយទៅជាតំបន់ សម្បូរហាង ភោជនីយដ្ឋាន ក្លឹបហាត់ប្រាណ និងកន្លែងកម្សាន្តនានា។
យោងតាមរបាយការណ៍ឆ្នាំ២០១៧ របស់ការិយាល័យរៀបចំដែនដី នគរូបនីយកម្ម សំណង់ និងភូមិបាលខណ្ឌសែនសុខ បានឲ្យដឹងថា មានគម្រោងសំណង់កំពុងស្នើសុំសាងសង់មានចំនួន១៥៧ទីតាំង។
ចំណែកសំណង់អគាររបស់រដ្ឋដែលបានសាងសង់រួច និងមិនទាន់រួចនៅក្នុងខណ្ឌសែនសុខ មានដូចជាអគារមន្ទីរផែនការ មន្ទីរសុខាភិបាល មន្ទីរឧស្សាហកម្ម មន្ទីរសង្គមកិច្ច និងធនាគារជាតិជាដើម។ ដោយឡែកផ្នែកឯកជនមានដូចជាអគារសកលវិទ្យាល័យអេស៊ីលីដា ផ្សារទំនើប និងសំណង់បុរីជាដើម។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានប្រាប់កាសែតភ្នំពេញប៉ុស្តិ៍អចលនទ្រព្យថា ខណ្ឌសែនសុខបានបង្ហាញពីសក្តានុពលនៃសេដ្ឋកិច្ចតាមរយៈការពង្រីកហេដ្ឋារចនាសម្ព័ន្ធ ការរស់នៅរបស់ប្រជាជនតំបន់នោះច្រើន ហើយការបោះទីតាំងរបស់អាជីវកម្មធំៗមានដូចជាផ្សារអ៊ីអន ២, ផ្សារ Makro និងសំណង់អាជីវកម្មផ្សេងៗទៀត។ ផ្នែកសេវាកម្មសាធារណៈ រាប់ទាំងស្ថានីយប្រេងសាំង ហាងកាហ្វេ និងភោជនីយដ្ឋានមានកាន់តែច្រើនដែលទាំងនេះបង្ហាញពីតម្រូវការ ឬការរីកដុះដាលផ្នែកសេដ្ឋកិច្ច ដែលជាសក្តានុពលនៃខណ្ឌនេះ។
លោកបន្តថា ៖ «កាលណាមានប្រជាពលរដ្ឋច្រើនសេដ្ឋកិច្ចក៏ត្រូវតែដើរទៅតាមតម្រូវការជាក់ស្តែង ឬសក្តានុពលទៅតាមតំបន់នីមួយៗ ដោយឆ្លុះបញ្ចាំងតាមរយៈសំណង់បុរី ផ្ទះល្វែង និងគម្រោងសំណង់នានាជាច្រើនទៀត»។
លោកបន្តថា ៖ «យើងមិនអាចប្រៀបធៀបរវាងខណ្ឌមួយទៅខណ្ឌមួយបានទេ ពីព្រោះកត្តាភូមិសាស្ត្រ មានលក្ខណៈខុសគ្នាដូចជាខណ្ឌទួលគោក ជាខណ្ឌមួយដែលរាប់បញ្ចូលខណ្ឌទាំង៤ នៅក្នុងក្រុង រួមមានខណ្ឌដូនពេញ ខណ្ឌចំការមន និងខណ្ឌ៧មករា ដែលនៅក្នុងខណ្ឌទាំង៤នេះ មានសំណង់និងសក្តានុពលសេដ្ឋកិច្ចកំពុងតែមានភាពរីកចម្រើន និងការផ្លាស់ប្តូរច្រើនជាបន្តបន្ទាប់»។
ដោយឡែកបើនិយាយពីស្ពានអាកាស សាលារាជធានីភ្នំពេញ មិនអាចដឹងពីទីតាំងរៀបចំ ឬសន្មតទុកជាមុនថា នឹងត្រូវបន្តធ្វើនៅទីតាំងណាមួយទេ ប៉ុន្តែការរៀបចំប្រព័ន្ធហេដ្ឋារចនាសម្ព័ន្ធត្រូវតែមាននៅពេលដែលប្រជាជនទៅរស់នៅតំបន់នោះកាន់តែច្រើន។
លោកបន្ថែមថា ៖ «យើងមានប្លង់គោលដើម្បីរៀបចំហេដ្ឋារចនាសម្ព័ន្ធសម្រាប់ប្រជាពលរដ្ឋ ដូចជាផ្លូវថ្នល់ និងការស្ថាបនាសំណង់នានាដែលស្របតាមលក្ខខណ្ឌនគរូបនីយកម្ម និងប្លង់គោល ដែលយើងមានស្រាប់»។
លោកក៏បានបញ្ជាក់ថា ស្ពានអាកាសនៅលើផ្លូវសហព័ន្ធរុស្សី និងមហាវិថីហាណូយសម្រេចបាន ៨០ ភាគរយ ហើយគ្រោងនឹងបញ្ចប់ការសាងសង់នៅមុនពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ ២០១៨ ខាងមុខនេះ។ «ការកសាងស្ពានអាកាស គឺដើម្បីបញ្ចៀសការកកស្ទះចរាចរណ៍ដែលយើងពុំអាចរកឱកាសក្នុងការដោះស្រាយបានល្អប្រសើរជាង កសាងស្ពានអាកាស ឬ ផ្លូវក្រោមដីនៃចំណុចប្រសព្វនៅតាមភូមិសាស្ត្រណាមួយជាក់ស្តែង»។
នាយកក្រុមហ៊ុន Key Real Estate លោក សន សៀប បានប្រាប់កាសែតភ្នំពេញប៉ុស្តិ៍អចលនទ្រព្យថា នៅគ្រប់តំបន់នៃរាជធានីកំពុងអភិវឌ្ឍមានភាពទាក់ទាញផ្សេងៗគ្នា ហើយរដ្ឋាភិបាលក៏ត្រូវមានការរៀបចំប្រព័ន្ធហេដ្ឋារចនាសម្ព័ន្ធ និងប្រព័ន្ធការពារសុវត្ថិភាពដល់ប្រជាជនឲ្យបានប្រសើរឡើង។
លោក សន សៀប បន្តទៀតថា ៖ «ការរស់នៅកន្លែងអភិវឌ្ឍន៍ថ្មីដែលមានសេវាចម្រុះដូចជាសាលារៀន មន្ទីរពេទ្យ ផ្សារទំនើប កន្លែងកម្សាន្ត និងសេវាសាធារណៈ មានភាពទាក់ទាញជាងការរស់នៅបណ្តុំគ្នាមួយកន្លែង។ ចំណែកខណ្ឌសែន សុខ នេះមានសក្កានុពលលូតលាស់លឿនក្នុងវិស័យអភិវឌ្ឍអចលនទ្រព្យបន្ទាប់ពីខណ្ឌនៅក្នុងទីក្រុង»៕