Hot line: +855 (0)99 283 388
រយៈពេលប៉ុន្មានឆ្នាំចុងក្រោយនេះបន្ទាប់ពីកំណើនសេដ្ឋកិច្ចកម្ពុជាកើនឡើងជាប្រចាំចំនួន ៧ ភាគរយក្នុងមួយឆ្នាំ បរិមាណប្រជាជនមានចំណូលមធ្យមកក៏រីកធំធាត់ និងមានតម្រូវការផ្សារទំនើប ផ្សារបោះដុំច្រើនសម្រាប់ជីវភាពរស់នៅប្រចាំថ្ងៃ ដែលកាន់តែមមាញឹករបស់ពួកគេ។
ក្រុមហ៊ុន Siam Makro រួមសហការដោយវិនិយោគិនក្នុងស្រុកបានបង្កើតផ្សារលក់ទំនិញដុំធំមួយនៅក្នុងរាជធានីភ្នំពេញ ដោយគ្រោងនឹងបើកសម្ពោធដាក់ឲ្យដំណើរការនៅចុងសប្តាហ៍នេះ។
ផ្សារលក់ទំនិញដុំដ៏ធំលំដាប់អន្ដរជាតិ Makro នៅក្នុងព្រះរាជាណាចក្រកម្ពុជា ដែលមានទីតាំងក្នុងតំបន់អភិវឌ្ឍន៍ទីក្រុង រណបពោងពាយ ដែលស្ថិតក្នុងសង្កាត់ភ្នំពេញថ្មី ខណ្ឌសែនសុខ ក្បែរផ្សារទំនើប អ៊ីអន ទី ២ នឹងបើកដំណើរការជាផ្លូវការនៅថ្ងៃទី ១៧ ខែធ្នូ ខាងមុខនេះ បន្ទាប់ពីការសាងសង់រួចរាល់តាមរយៈពេលកំណត់របស់ខ្លួន។
ផ្សារ Makro ផ្សារលក់ទំនិញដុំដ៏ធំលំដាប់អន្ដរជាតិមានជិត ១០០ ទីតាំងនៅ ក្នុងប្រទេសថៃ ក្រុមហ៊ុននេះមានបំណងពង្រីកទីផ្សាររបស់ខ្លួននៅប្រទេសផ្សេងៗ នៅតំបន់អាស៊ីអាគ្នេយ៍នៅក្នុងឆ្នាំ ២០១៧ នេះ។
នៅកម្ពុជាផ្សារ Makro នឹងធ្វើការសហការជាមួយកសិករកម្ពុជានិងអ្នកផ្គត់ផ្គង់ក្នុងស្រុកដើម្បីទទួលយកផលិតផលដែលមានគុណភាពខ្ពស់ មានអនាម័យត្រឹមត្រូវ និងសុវត្ថិភាពសម្រាប់អតិថិជនរបស់ខ្លួន។
លោក ហោ វាសនា អភិបាលរងនៃគណៈអភិបាលខណ្ឌសែនសុខ បានប្រាប់កាសែតភ្នំពេញ ប៉ុស្តិ៍ អចលនទ្រព្យថា ផ្សារលក់ទំនិញដុំដ៏ធំរបស់ប្រទេសថៃ នៅកម្ពុជា នឹងចាប់ផ្តើមសម្ពោធនៅថ្ងៃទី ១៧ ខែធ្នូនេះ ហើយផ្សារនេះជាផ្សារមួយដែលធំនៅក្នុងតំបន់ភាគពាយ័ព្យនៃរាជធានីភ្នំពេញ។
លោកបន្តថា ៖ «ស្របពេលការអភិវឌ្ឍផ្សារដ៏ធំនេះបានបង្ហាញពីសក្តានុពលនៃការអភិវឌ្ឍប្រទេសប្រកបដោយចីរភាព»។
អភិបាលរងខណ្ឌរូបនេះ បានមានប្រសាសន៍ថា ៖ «ក្រៅពីការសាងសង់បុរីជាច្រើនក្នុងខណ្ឌសែនសុខតំបន់នេះគឺជាកន្លែងសក្តានុពលសម្រាប់ទីផ្សារធំៗ ពីបរទេស ដូចជា គម្រោង Makro និង AEON2 ជាដើម»។
ផ្សារលក់ទំនិញដុំដែលមានទំហំ ១ ម៉ឺនម៉ែត្រការ៉េនេះ ត្រូវបានសាងសង់ដោយមានកម្ពស់ ២ ជាន់ ស្ថិតលើផ្ទៃដីទំហំ ៥ ហិកតា។ រីឯ បរិវេណផ្ទៃដីនៅសល់ គឺជាចំណតយានយន្តគ្រប់ប្រភេទ និងជាសួនច្បារ។
អ្នកស្រី ពៅ ណារី ជាប្រជាជនដែលរស់នៅខណ្ឌសែនសុខបានឲ្យដឹងថាការរស់នៅរបស់ប្រជាជនគឺចាំបាច់ត្រូវមានផ្សារ ហើយអ្វីដែលធ្វើឲ្យត្រេកអរនោះគឺផ្ទះរបស់អ្នកស្រីនៅក្បែរផ្សារធំលំដាប់អន្តរជាតិតែម្តង។
អ្នកស្រី ណារី បន្តថា ៖ «ខ្ញុំសប្បាយចិត្តនៅពេលដែលផ្សាររបស់បរទេសមកបើកនៅប្រទេសកម្ពុជា ដែលអាចផ្តល់ឱកាសការងារច្រើនដល់ប្រជាជន ការទិញលក់ផលិតមានគុណភាព»។
នាយកក្រុមហ៊ុន Key Real Estateលោក សន សៀបបានប្រាប់កាសែតភ្នំពេញប៉ុស្តិ៍អចលនទ្រព្យថា ក្រៅពីសក្តានុពលនៃការអភិវឌ្ឍនៅខណ្ឌសំខាន់ៗមួយចំនួនក្នុងរាជធានី ខណ្ឌនៅតាមជាយក្រុង ដូចជា ខណ្ឌសែនសុខ ក៏មានការអភិវឌ្ឍឆាប់រហ័សដោយសារសំណង់ផ្សារធំៗ និងសំណង់បុរីជាច្រើន។
លោកបន្ថែមថា ៖ «នៅពេលដែលមានផ្សារធំៗវិនិយោគនៅទីនោះតម្លៃអចលនទ្រព្យជាពិសេសដី និងសំណង់ផ្ទះមានការកើនឡើងជាបន្តបន្ទាប់នៅតំបន់ជាយក្រុង»។
យោងតាមការចេញផ្សាយរបស់កាសែតភ្នំពេញប៉ុស្តិ៍ កាលពីថ្ងៃទី ៣០ ខែកញ្ញា ឆ្នាំ ២០១៦ បានបង្ហាញថា ៖ ក្រុមហ៊ុន Makro ROH Co., Ltd. ដែលជាក្រុមហ៊ុនដើមរបស់ Siam Makroជាអ្នកវិនិយោគផ្សារ Makro នៅកម្ពុជា បានចុះបញ្ជិកាវិនិយោគនៅក្រសួងពាណិជ្ជកម្ម (កម្ពុជា) ក្នុងតម្លៃ ២ លានដុល្លារ ដោយក្រុមហ៊ុនថៃមួយនេះដាក់ទុនវិនិយោគចំនួន ៧០ ភាគរយ ជាមួយក្រុមហ៊ុនដៃគូវិនិយោគក្នុងស្រុករបស់លោកឧកញ៉ា លី យ៉ុងផាត់ ប្រធានក្រុមហ៊ុន LYP ដោយ មានភាគហ៊ុនចំនួន ៣០ ភាគរយទៀត៕