រាជធានីភ្នំពេញ ៖ បឹងកេងកង ជាតំបន់មានសក្ដានុពលទាំងការវិនិយោគ ពាណិជ្ជកម្ម និងការរស់នៅយូរមកហើយ ប៉ុន្តែបន្ទាប់ពីតំបន់នេះ ក៏មានតំបន់មួយចំនួនទៀត ដែលវិនិយោគិនបានសម្លឹង និងកំពុងបណ្ដាក់ទុនវិនិយោគលើវិស័យអចលនទ្រព្យផងដែរ ជាពិសេស សំណង់អគារពាណិជ្ជកម្ម និងលំនៅឋាន ។ តើតំបន់ណាដែលមានសក្ដានុពលបន្ទាប់ពីតំបន់នេះ ?
បើតាមការវាយតម្លៃពីភ្នាក់ងារអចលនវត្ថុនៅកម្ពុជា បានបង្ហាញពីភាពស្រដៀងគ្នា ដែលកំពុងមានសក្ដានុពលក្នុងវិស័យអចលនទ្រព្យ ទាំងលំនៅឋាន និងពាណិជ្ជកម្ម ។ យោងតាមគេហទំព័រអចលនទ្រព្យខ្មែរ បានឲ្យដឹងថា តំបន់ទន្លេបាសាក់ គឺជាទីតាំងល្អមួយសម្រាប់ការវិនិយោគជាអគារពាណិជ្ជកម្ម ការិយាល័យ និងអគារខុនដូ ។ ជាក់ស្ដែង តំបន់នៅទីក្រុងរណបកោះពេជ្រ សំណង់អគារជាច្រើនកំពុងរីកលូតលាស់ជាបន្តបន្ទាប់ ក្នុងនោះមានគម្រោងខ្លះបានបញ្ចប់ និងគម្រោងខ្លះទៀតកំពុងសាងសង់ ដោយគ្រោងនឹងបញ្ចប់នៅពេលខាងមុខ ។
តាមការសង្កេតជាក់ស្ដែងនៅតំបន់ទន្លេបាសាក់ ក៏មានអគារប្រណីតៗមួយចំនួនបានបញ្ចប់គម្រោង និងដាក់ដំណើរការជាផ្លូវការ ដែលធ្វើឲ្យតំបន់នោះកាន់តែមានភាពទាក់ទាញពីសំណាក់វិនិយោគិនជាតិ និងអន្តរជាតិថែមទៀតផង ។ ក្នុងនោះ អគារសណ្ឋាគារណាហ្គាវើលទី២ ដែលទើបនឹងដាក់ដំណើរការជាផ្លូវការកាលពីពេលថ្មីៗនេះ ក៏ជាសក្ខីភាពមួយបង្ហាញពីសក្ដានុពល និងផ្ដល់តម្លៃដល់តំបន់ទន្លេបាសាក់ កាន់តែមានមុខមាត់ថែមទៀត ។
ដោយឡែក ភ្នាក់ងារវាយតម្លៃអចលនវត្ថុកម្ពុជា បានវាយតម្លៃថា ក្រៅពីតំបន់បឹងកេងកងនៃខណ្ឌចំការមន ដែលមានសក្ដានុពលខ្ពស់ទាំងការរស់នៅ ពាណិជ្ជកម្ម និងវិនិយោគ ក៏មានតំបន់ផ្សេងទៀតដែរ ក្នុងនោះ ខណ្ឌដូនពេញ ក៏ជាតំបន់ដែលមានសក្ដានុពលសម្រាប់លំនៅឋានដែរ ហើយតម្លៃដីធ្លីនៅតំបន់នេះ ក៏មិនក្រោមតំបន់បឹងកេងកង និងទន្លេបាសាក់ច្រើនប៉ុន្មានទេ ។
លោក ឌឹត ចណ្ណា ប្រធានក្រុមហ៊ុនអចលនទ្រព្យឡាក់គី បានឲ្យដឹងថា លោកមើលឃើញថា តំបន់មួយចំនួននៅខណ្ឌដូនពេញ កំពុងតែមានការចាប់អារម្មណ៍លើការវិនិយោគបន្ថែម ជាពិសេស វិនិយោគទៅលើអគារការិយាល័យ និងខុនដូ ។
លោកបន្តថា បើក្រឡេកមើលទៅតំបន់ក្នុងខណ្ឌដូនពេញ មានកន្លែងខ្លះតម្លៃដីក៏ខ្ពស់ដែរ ព្រមទាំងមានការចាប់អារម្មណ៍ពីវិនិយោគិនជាច្រើន ព្រោះវាជាតំបន់នៅចំណុចកណ្ដាលរាជធានី ។
បើតាមប្រសាសន៍របស់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឲ្យដឹងដែរថា តម្លៃដីធ្លីនឹងមិនចុះទៀតទេ មានតែបន្តឡើងថ្លៃ ព្រោះដីអត់កើតទេ តែមនុស្សកើតជារៀងរាល់ថ្ងៃ ហើយកំណើនមនុស្សនេះហើយដែលធ្វើឲ្យមានតម្រូវការដីធ្លី ។
លោកបានផ្ដល់ជាយោបល់មួយដល់ប្រជាពលរដ្ឋកម្ពុជាទូទៅថា គួរតែទិញដីទុកសម្រាប់វិនិយោគ ឬសង់ផ្ទះនៅពេលអនាគត បើសិនជាមិនទាន់មានលទ្ធភាពទិញផ្ទះស្នាក់នៅផ្ទាល់ខ្លួន ៕