Hot line: +855 (0)99 283 388
រាជធានីភ្នំពេញ ៖ បើទោះបីជាស្ថានភាពនយោបាយមើលទៅកំពុងឡើងកម្តៅ ដោយសារតែការរំលាយគណបក្សសង្គ្រោះជាតិ ដែលជាគណបក្សប្រឆាំងធំមួយនៅកម្ពុជាក្ដី តែការវិនិយោគទាំងក្នុងនិងក្រៅស្រុក នៅតែដំណើរការល្អប្រសើរ និងគ្មានផលប៉ះពាល់អ្វីទេ ។ នេះបើតាមអ្នកជំនាញខាងវិនិយោគនៅកម្ពុជា ។
លោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting សង្កេតឃើញថា សម្រាប់ការវិនិយោគរយៈពេលវែងគឺនៅតែបន្ត ប៉ុន្តែការវិនិយោគរយៈពេលខ្លី មានក្រុមហ៊ុនខ្លះស្ថិតក្នុងការរង់ចាំមើលស្ថានការណ៍នយោបាយសិន ។
ក្រៅពីការវិនិយោគខាងផ្នែកឧស្សាហកម្ម និងកសិ-ឧស្សាហកម្មនោះ អចលនទ្រព្យនិងទេសចរណ៍ គឺជាវិស័យដែលមានសក្តានុពលក្នុងការទាក់ទាញវិនិយោគិននៅក្រៅប្រទេស មកបោះទុនយ៉ាងសន្ធឹកសន្ធាប់នៅកម្ពុជា ។
លោក ង៉ែត ជូ បានលើកឡើងថា ខណៈកម្តៅនយោបាយមិនថមថយ ការវិនិយោគភាគច្រើន គឺទៅលើវិស័យអចលនទ្រព្យ ។ ដូច្នេះក្នុងបរិបទបែបនេះ បើសិនជាធ្វើការវិនិយោគរយៈពេលវែងទៅលើវិស័យអចលនទ្រព្យ គឺជាឱកាសល្អសម្រាប់វិនិយោគិនខ្មែរ និងបរទេស ។
គិតចាប់តាំងពីឆ្នាំ២០០០ រហូតដល់ឆ្នាំ២០១៧នេះ មានប្រទេស៥ត្រូវបានចាត់ទុកថា ជាប្រទេសដែលមកបណ្ដាក់ទុនវិនិយោគនៅកម្ពុជាច្រើនជាងគេ ក្នុងនោះ ប្រទេសមហាអំណាចចិនឈរនៅលំដាប់ទី១ ដែលបានបោះទុនវិនិយោគចំនួន១២១គម្រោង ស្មើនឹងទឹកប្រាក់ប្រមាណ២ពាន់លានដុល្លារអាមេរិក។ នេះបើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ។
របាយការណ៍ដដែលបានបង្ហាញថា ប្រទេសដែលតាមពីក្រោយចិន គឺកូរ៉េខាងត្បូង បានវិនិយោគលើ៤៨គម្រោង ស្មើនឹងទឹកប្រាក់ប្រមាណ១.៦៣៧លានដុល្លារអាមេរិក។ ចំណែកប្រទេសជប៉ុនវិញ គឺឈរនៅចំណាត់ថ្នាក់លេខ៣ ដែលបានបោះទុនវិនិយោគនៅកម្ពុជា ក្នុងរយៈពេល១៧ឆ្នាំ មានចំនួន៣៧គម្រោង ស្មើនឹងទឹកប្រាក់ប្រមាណ២៤៥លានដុល្លារអាមេរិក ។ រីឯប្រទេសទី៤ គឺសិង្ហបុរីបានមកវិនិយោគចំនួន៩គម្រោង ស្មើនឹងទឹកប្រាក់ប្រមាណ១៤៩ លានដុល្លារអាមេរិក និងថៃដែលជាប្រទេសជិតខាង ឈរនៅលំដាប់ទី៥ វិនិយោគចំនួន២៥ គម្រោង ស្មើនឹងទឹកប្រាក់ប្រមាណ១៤៦លានដុល្លារអាមេរិក ។
យ៉ាងណាមិញ នៅពេលថ្មីៗនេះ វិនិយោគិន ខេត្តស៊ីឈាន់ ប្រទេសចិន នឹងដាក់ខេត្តព្រះសីហនុ ជា Sister City របស់ខ្លួន ខណៈខេត្តជាប់មាត់សមុទ្រមួយនេះជាតំបន់កំពុងមានសក្តានុពលខ្លាំងលើគ្រប់វិស័យ ដូចជា វិស័យទេសចរណ៍ និងអចលនទ្រព្យជាដើម ។
លោកបណ្ឌិតសេដ្ឋកិច្ច គី សេរីវឌ្ឍន៍ និងជាមន្ត្រីផ្នែកស្រាវជ្រាវនៅរាជបណ្ឌិត្យសភាកម្ពុជា មានប្រសាសន៍ថា ការវិនិយោគនៅកម្ពុជាក្នុងឆ្នាំ២០១៧នេះ នៅតែមាន «សញ្ញាវិជ្ជមាន» ដដែល ប៉ុន្តែមានកម្លាំងថមថយជាងមុនបន្ដិច។ វិស័យដែលវិនិយោគច្រើនជាងគេ គឺវិស័យសំណង់ និងសេវាកម្ម ។ យ៉ាងណាក៏ដោយ លោកថា បញ្ហានយោបាយក៏ជះឥទ្ធិពលមកលើការមកបោះទុនវិនិយោគផងដែរ ។
លោកបណ្ឌិតបន្តថា ៖« ខ្ញុំយល់ថា អ្នកវិនិយោគកំពុងតែពិចារណាហើយ ។ ឧទាហរណ៍ថា កាលណាវិបត្តិនយោបាយកើតឡើង គឺអ្នកវិនិយោគត្រូវតែស្ទង់មើលសិនថា តើសភាពការណ៍នយោបាយវាប្រែប្រួលយ៉ាងម៉េច ប៉ុន្តែបើអ្នកវិនិយោគមួយចំនួនធ្វើការវិនិយោគក្នុងទ្រង់ទ្រាយធំ គេមានអ្នកព្យាករណ៍អំពីកត្តានយោបាយនេះ ។ អីចឹង គេអាចប៉ាន់ស្មាន និងសម្រេចចិត្តក្នុងការវិនិយោគ មានន័យថា គេអាចមកវិនិយោគ បើសិនជាគេប៉ាន់ស្មានថា កត្តានយោបាយគ្មានឥទ្ធិពលអាក្រក់ទេនោះ » ។
យ៉ាងណាមិញ វិនិយោគិនវិស័យអចលនទ្រព្យក្នុងស្រុកនៅតែមានសុទិដ្ឋិនិយមថា សភាពការណ៍នយោបាយបច្ចុប្បន្ន គ្មានផលប៉ះពាល់ដល់ការវិនិយោគលើវិស័យសំណង់ អចលនទ្រព្យ និងលំនៅឋានទេ ព្រោះរាជ រដ្ឋាភិបាលនៅតែរក្សាបាននូវសុខសន្តិភាព និងបើកឱកាសដល់វិនិយោគិនទាំងក្នុង និងក្រៅប្រទេសជានិច្ច ៕