Hot line: +855 (0)99 283 388
រាជធានីភ្នំពេញ ៖ អ្នកជំនាញវិស័យអចលនទ្រព្យមើលឃើញថា ក្នុងបរិបទសព្វថ្ងៃនេះ ពលរដ្ឋភាគច្រើនមានលទ្ធភាពទិញផ្ទះតម្លៃក្រោម១០ម៉ឺនដុល្លារ ហើយអ្នកអភិវឌ្ឍន៍គម្រោងសាងសង់ក៏មានការផ្គត់ផ្គង់ច្រើនដែរ ។
បើតាមនាយកក្រុមហ៊ុន Century 21 បានឱ្យដឹងថា បច្ចុប្បន្ន កំណើនអ្នកមានជីវភាពមធ្យមដែលរស់នៅរាជធានីភ្នំពេញ បានកើនឡើងជាបន្ដបន្ទាប់ ហើយតម្រូវការលំនៅឋានស្នាក់នៅក៏កំពុងកើនឡើងដែរ ជាពិសេសលំនៅឋានដែលមានតម្លៃក្រោម១០ម៉ឺនដុល្លារ គឺកំពុងមានការគាំទ្រច្រើន ។
លោក វ៉ា វីរៈ នាយកក្រុមហ៊ុន Century 21 បានមានប្រសាសន៍កាលពីថ្ងៃទី១៣ តុលា ម្សិលមិញថា ៖« ដោយសារមានកំណើនពលរដ្ឋមករស់នៅទីក្រុងភ្នំពេញច្រើន ហើយកម្រិតជីវភាពសមរម្យ អីចឹង ផ្ទះដែលមានតម្លៃមធ្យមពី៥ទៅ១០ម៉ឺនដុល្លារ គឺមានអតិថិជនទិញច្រើនសម្រាប់រស់នៅ ។ ជាទូទៅ ទីផ្សារផ្ទះតម្លៃពី៥ទៅ១០ម៉ឺនដុល្លារ គឺកំពុងតែមានទីផ្សារ » ។
ជាមួយនឹងតម្រូវការលំនៅឋានតម្លៃក្រោម១០ម៉ឺនដុល្លារនេះកំពុងមានទីផ្សារ អ្នកអភិវឌ្ឍន៍នានាក៏កំពុងសាងសង់គម្រោងឲ្យស្របនឹងតម្រូវការរបស់អតិថិជនផងដែរ ដោយសង់ជាបុរីផ្ទះល្វែងយ៉ាងច្រើននៅជុំវិញរាជធានីភ្នំពេញ ។
លោក សន សៀប នាយកក្រុមហ៊ុន Key Real Estate មានប្រសាសន៍ថា ៖« ខ្ញុំមើលឃើញថា ការសាងសង់ផ្ទះជារួមនៅតាមបុរី គេធ្វើផ្ទះមានតម្លៃធូរថ្លៃ និងមធ្យមច្រើនជាងផ្ទះដែលមានតម្លៃថ្លៃ ហើយបច្ចុប្បន្ន មានអ្នកសាងសង់ និងអ្នកទិញលក់ក៏ច្រើនដែរ » ។
លោកបន្តថា ៖« ការវិនិយោគ ជាធម្មតាដូចគ្នានឹងការទិញលក់ដែរ គេវិនិយោគមើលទៅលើអតិថិជន បើតម្រូវការក្នុងផ្នែកណាច្រើន គេនឹងវិនិយោគលើផ្នែកនោះ ។ ដូច្នេះ ការវិនិយោគលើអចលនទ្រព្យដែលមានតម្លៃក្រោម១០ម៉ឺនដុល្លារ វាធ្វើឱ្យការទិញដូរមានច្រើននាពេលបច្ចុប្បន្ន ហើយនៅក្នុងគម្រោងរបស់អ្នកអភិវឌ្ឍន៍ ក៏ធ្វើច្រើនជាងគេដែរ » ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting មានប្រសាសន៍ថា ៖«ការផ្គត់ផ្គង់ គឺមើលទៅលើចំណូលរបស់ពលរដ្ឋ ។ បច្ចុប្បន្ន អ្នកមានចំណូលមធ្យមកើនឡើង អ្នកផ្គត់ផ្គង់ខុនដូ និងផ្ទះដែលមានតម្លៃលើស៥ម៉ឺនដុល្លារឡើង ក៏មានច្រើនដែរ ។ ចំណែកលំនៅឋានត្រឹម៤ម៉ឺនដុល្លារចុះក្រោម ទីផ្សារនៅមានសក្តានុពលនិងមានត្រូវការធំ ដូច្នេះ បើអ្នកអភិវឌ្ឍន៍ចាប់យកទីផ្សារនេះ ជាការល្អ អាចនឹងធ្វើឱ្យទីផ្សារមួយនេះរឹងមាំបាន » ៕
