Hot line: +855 (0)99 283 388
រាជធានីភ្នំពេញ ៖ បច្ចុប្បន្ន នៅតំបន់បឹងកប់ស្រូវ នាបែកពាយ័ព្យនៃរាជធានី ត្រូវបានគេមើលឃើញថា មានអ្នកដើរទិញដីធ្លីដើម្បីពុះជាឡូត៍លក់កាន់តែសកម្មខ្លាំងឡើង ហើយក៏មានអ្នកវិនិយោគខ្លះរកដីទិញទំហំធំៗដើម្បីសាងសង់ជារោងចក្រ និងឃ្លាំងផងដែរ ខណៈតម្លៃដីនៅទីនោះហាក់ទាបនៅឡើយ ។ នេះបើតាមអ្នករកស៊ីក្នុងវិស័យនេះ ។
លោក ជា កុយ ប្រធានក្រុមការងារពុះដីឡូត៍លក់បានឱ្យដឹងថា ពេលនេះ សកម្មភាពទិញលក់ដីធ្លីនៅម្ដុំបឹងកប់ស្រូវ ជាពិសេសនៅម្ដុំតំបន់ភ្នំរាប និងភ្នំប្រសិទ្ធិ កំពុងតែមមាញឹកយ៉ាងខ្លាំង ដោយសារតែតំបន់នោះនៅមិនឆ្ងាយពីរាជធានីភ្នំពេញ ហើយរាជរដ្ឋាភិបាលក៏គ្រោងនឹងកាត់ចូលក្នុងរដ្ឋបាលរាជធានីនាពេលខាងមុខផងដែរ។ ម្យ៉ាងទៀត តម្លៃដីធ្លីនៅតំបន់នោះក៏នៅទាប ដែលអាចសម្រួលច្រើនដល់អ្នកដែលមានប្រាក់ចំណូលទាបនិងមធ្យម ជាពិសេសតម្លៃដីឡូត៍ទិញហើយ អាចបង់រំលស់បានទៀតផង ។ អ្វីដែលពិសេសទៀតនោះ តំបន់នៅជិតបឹងកប់ស្រូវជាតំបន់ដែលមិនលិចទឹក ហើយចរាចរណ៍ក៏មិនកកស្ទះដូចនៅតំបន់ផ្សេងៗជុំវិញរាជធានីទេ ដែលជាហេតុធ្វើឲ្យមានអ្នករកដីសម្រាប់សង់ផ្ទះ ឬគម្រោងផ្សេងៗ ។
លោកថា ៖« អនាគតនៃតំបន់ជុំវិញបឹងនេះ ពិសេសនៅម្ដុំភ្នំប្រសិទ្ធិ និងភ្នំរាបជាដើមនោះ នឹងក្លាយជាតំបន់ឧស្សាហកម្មដ៏មមាញឹកមួយ ព្រោះមានគម្រោងធំៗរបស់អ្នកមានទុនមួយចំនួននៅកម្ពុជា ក៏កំពុងដំណើរការហើយដែរ ដែលយ៉ាងយូរ រយៈពេល៤ឬ៥ឆ្នាំទៀត គម្រោងទាំងនោះ នឹងដំណើរការ » ។
លោកបន្តទៀតថា តម្លៃដីនៅតំបន់នោះបានឡើងបន្តិចម្ដងៗ ខណៈសកម្មភាពទិញលក់ក៏មានច្រើន ។ ជាក់ស្ដែង អ្នកទិញដីឡូត៍កាលពីប៉ុន្មានខែមុនត្រឹមតែ២ឬ៣ពាន់ដុល្លារ ពេលនេះបើលក់វិញ អាចចំណេញរហូតដល់១ពាន់ដុល្លារអាមេរិកក្នុង១ឡូត៍ ។
លោកនិយាយថា ៖« ស្របពេលសកម្មភាពវិនិយោគដីធ្លីនៅទីនោះមានកំណើនពីមួយថ្ងៃទៅមួយថ្ងៃ យើងក៏មើលឃើញថា ប្រព័ន្ធហេដ្ឋារចនាសម្ព័ន្ធ ក៏មានការរៀបចំបានស្អាតល្អដែរ ទាំងប្រព័ន្ធផ្លូវថ្នល់ ទឹក និងភ្លើងជាដើម » ។ លោកថា ៖« នៅថ្ងៃអនាគត តំបន់នោះជាកន្លែងបណ្ដុំដោយរោងចក្រ សហគ្រាស និងជាកន្លែងសម្រាប់អ្នកមានចំណូលមធ្យមរស់នៅ។ ម្យ៉ាងទៀត ពេលនេះក៏មានក្រុមហ៊ុនមួយចំនួនបានសម្លឹងរកការវិនិយោគទៅលើសាលារៀន និងមន្ទីរពេទ្យដែរ ដើម្បីបំពេញតម្រូវការចាំបាច់របស់ប្រជាពលរដ្ឋនៅក្នុងតំបន់នោះ ដែលនឹងកើនឡើងនៅពេលអនាគតដ៏ខ្លីនេះ » ។
បើតាមអ្នកវាយតម្លៃអចលនទ្រព្យបានលើកឡើងថា និន្នាការតម្លៃដីធ្លីនៅកណ្ដាលក្រុងបានឡើងថ្លៃខ្ពស់ ដែលមិនអាចឲ្យអ្នកមានចំណូលទាប និងមធ្យមទិញ ឬសម្រាប់សង់ផ្ទះនៅកណ្ដាលក្រុងបានទេ ។
ដូច្នេះ សកម្មភាពពុះដីឡូត៍លក់នៅជាយរាជធានី ឬតំបន់តាមខេត្តជាប់រាជធានី គឺជារឿងល្អមួយ ដែលប្រជាពលរដ្ឋអាចមានលទ្ធភាពទិញសម្រាប់សង់ផ្ទះបាន ។ ម្យ៉ាងទៀត ការទិញដីឡូត៍នៅតាមខេត្តជាប់រាជធានី ក៏មានលក្ខខណ្ឌអំណោយផលដល់អ្នកពុំមានប្រាក់គ្រប់គ្រាន់ ដោយធ្វើការទិញបង់រំលស់ប្រចាំខែបាន ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងការអភិវឌ្ឍនៃក្រុមហ៊ុន Emerging Marketing Consulting បានឱ្យដឹងថា ការទិញអចលនទ្រព្យដោយបង់រំលស់ វាមានសារសំខាន់ចំពោះអ្នកដែលគ្មានទុនគ្រប់គ្រាន់ក្នុងការបង់ផ្ដាច់ ហើយនិន្នាការនេះបានកើតឡើងនៅកម្ពុជា។ ជាក់ស្ដែង ការទិញគម្រោងខុនដូ ក៏មានការបង់រំលស់ ការទិញផ្ទះក៏បង់រំលស់ ហើយការទិញដីឡូត៍នេះ ក៏បង់រំលស់ដូចគ្នាដែរ។ វាបានជួយសម្រួលច្រើនដល់ប្រជាពលរដ្ឋមានជីវភាពមធ្យម ដែលស្វែងរកដីធ្លីសម្រាប់សង់ផ្ទះរស់នៅ ។
លោក គឹម សេង ពលរដ្ឋដែលបានទិញដីបង់រំលស់នៅតំបន់បឹងកប់ស្រូវ បានឲ្យដឹងផងដែរថា បើតាមកម្រិតប្រាក់ចំណូលរបស់លោក មិនអាចឲ្យលោកទិញផ្ទះ ឬដីបង់ផ្ដាច់បានទេ ។ ដូចនេះ ជម្រើសរបស់លោក គឺទិញដីបង់រំលស់ ហើយលោកក៏បានសម្លឹងមើលឃើញទីតាំងនៅតំបន់ខាងលិចកប់ស្រូវ ដោយសារតែតំបន់នោះទើបអភិវឌ្ឍន៍ថ្មីៗ ហើយតម្លៃដីនៅទាប ។ ម្យ៉ាងទៀត បើពេលអនាគត លោកមិនចង់ទៅសង់ផ្ទះរស់នៅទីនោះ ក៏អាចលក់ដីឡូត៍វិញបានចំណេញខ្លះៗដែរ ។
លោកឧកញ៉ា នួន រឹទ្ធី អគ្គនាយកក្រុមហ៊ុន អចលនទ្រព្យ Khmer Founder Appraisal បានឱ្យដឹងថា វាជាការពិតហើយ ដែលការអភិវឌ្ឍត្រូវរីកសាយទៅកាន់តំបន់ជាយៗរាជធានី ហើយការរីកចម្រើនក៏មិនដូចគ្នាដែរ មានតំបន់ខ្លះរីកខ្លាំង ឯតំបន់ខ្លះទៀតរីកចម្រើនមធ្យម។ លោកឧកញ៉ាថា ៖« ការរីកចម្រើនទៅតាមជាយៗរាជធានី ដោយសារតែដីធ្លីនៅតំបន់ទាំងនោះនៅមានតម្លៃទាប » ៕
